جاك الكلاسي في "العنصرة" : منصللي ليضل صوت تيلي لوميار من هالشرق... يعمل فرق

اليوم منختتم أول سنة يوبيلية فضية لتيلي لوميار،

25 سنة مرّت على عمل هالرسالة وكأنها يوم عبَر،

25 سنة من التحديات، من السهر والحملات، من عمل وتعب وخدمة وتضامن وحوار وتواصل وتلاقي وزرع جيّد.

25 سنة وتيلي لوميار عم تزداد تألق بأنوار من نور،

من نورسات لنور الشباب لنور الشرق لنور مريم لنور الطفل لنور القداس،

فضائيات تملأ الأرض،

وبالإضافة لهال 6 فضائيات،

ما نستهون البث الحيّ عبر الإنترنت في 4 محطات هي نور الموسيقى، نور الكلمة، نور spirit ونورنيوز.

ما نستهون 25 مليون مشاهد و10 مليون متابع عبر الإنترنت.

على مدى 25 سنة تيلي لوميار صارت علامة وحدة مش بس بين الكنائس كمان على صعيد وطن.

بفتخر قول إنو محطتنا قادرة تجمع الكل حواليها وتكون مقبولة من الجميع مسلمين قبل المسيحيين : هيدا بحد ذاته إنجاز.

بتعاليم إنجيلنا منقرا : أقوى وأهم التعابير للمحبة والسلام والرحمة إللي بيدعينا لعيشها إلهنا يسوع المسيح :

" ليسالم بعضكم بعضاً"

"لا تَدينوا...."

"طوبى للرحماء"

"أحبب عدوّك"

بنشرات أخبارنا منشوف :

المزيد من التفجيرات في عمليات إنتحارية

إصابات لا تُعد ولا تحصى في صفوف العدو

بدأت الأعمال الحربية ولن تتوقف حتى آخر نقطة دمْ

شو هالتناقض الغريب..

هالصورة للآله العنيف هي من صنع بشر

وهالصورة عم تنقلها وسائل إعلام شغلتها تدمير البشر

إجا الوقت لأعلان الحرب على الحرب

اليوم  وبنهاية سنة اليوبيل ومع صاحب الغبطة عم نطلق موقع إخباري مسيحي بإمتياز نورنيوز ليكون سيف بإيد الكنيسة ويوصل الكلمة الصحيحة لعدد أكبر من الشباب والعيل اللي بدّها الحقيقة وعم بتفتّش عالحقيقة.

نورنيوز موقع

ليحارب قيام حركات أصولية

ليحارب قيام آلهة عنف

ليحارب البدع اللي عم تدخل مجتمعنا

ليقتل روح الغرور ويطفّي نار الحروب ويخللي كل واحد منّا يشوف الخير بالآخر

هالموقع رح يكون بشارة فرح

هالموقع ليمرّن ضمير الإنسان ليميّز بين الخير والشر

وجودنا بهالشرق منّو ضمانة لبقائنا

لنبقى فعلاً فاعلين بهالشرق بدنا نعمل صيانة لوجودنا

صيانة وجودنا بتكون عبر الإعلام

إعلام السطحية والسخافات عمْ بقوّي التطرف

ما ممكن نستمر للأبد هيك

كم واحد منّا بعدو متذكر إنو هالسنة هيّي سنة الرحمة الإلهية

كم واحد منا عم بخبّر إنو إلهنا إله رحمة

إلهنا إله قلب منسحق

إلهنا إله يا بني أعطني قلبك

إلهنا منّو إله ألم وحزن ودموع

منّو إله إنقسامات

منّو إله إهانة وسب وفضائح وتشهير

إلهنا منّو إله بلبلة

إلهنا عم يسأل عن أعمال كتير زغيري

نقطة ميّ باردة تسقيها لعطشان

شقفة خبزة بتعطيها لجوعان

زيارة لمريض

زيارة لسجين

إلخ...

أعمال كتير زغيري لكن قيمتها أبدية

تيلي لوميار وفضائياتها والموقع الجديد هيّي للتذكير والتأكيد والمساعدة على بناء مجتمعات متماسكة خلاّقة جريئة صادقة حرّة ومسؤولة

منشكر ربنا على صاحب الغبطة البطريرك الكاردينال مار بشارة بطرس الراعي وعلى كل رؤساء الكنائس إللي رافقونا وساندونا بصلواتهم

منشكر ربنا على كل المشاهدين، على كل الأصدقاء والأحباء إللي صلوا لهالمحطة لتستمر وتبقى وفية لرسالتها

بدي اشكر كل إللي رافقوا هالمحطة من 25 سنة لليوم وعطونا من فكرهم ووقتهم

بدي اشكر كل اللي ضحوا بمالهم وبتقديماتهم المالية والعينية

بدي اشكر كل الموظفين والمعدّين والمقدمين والتقنيين على كل تعبهم وجهودهم وتضحياتهم وسهرهم وعلى تحملهم ضغوط العمل

معهم ومع كل المشاهدين ومع صاحب الغبطة وكل الكنائس منصللي لتبقى محطتنا علامة قوة ورجا وايمان وشاشة منتعلم من خلالها إنو نقبل بعضنا البعض لننتصر على الحقد ونتحرر من العنف ويضل صوت تيلي لوميار من هالشرق... يعمل فرق.